Сэрэмжлүүлэг: Өчигдөр өвс шатсан дөрвөн дуудлага бүртгэжээ

Өчигдөр /2023.10.26/ Онцгой байдлын газарт гал түймрийн 10 дуудлага бүртгэгджээ. Үүний дөрвөн тохиолдолд нь өвс шатсан байна.

Улаанбаатар хот, Хан-Уул дүүрэг. 14 дүгээр хорооны Доод-Өлзийтийн 1 дүгээр гудамжинд хашаа шатаж байна гэсэн дуудлагыг 10.26-ны өдрийн 15:27 цагт хүлээн авсан. Тус дүүргийн Онцгой байдлын хэлтсийн Гал түймэр унтраах, аврах 65 дугаар ангийн алба хаагчид 10 км замыг туулан 15:40 цагт очиход иргэн Б-ын хашаанд 2 тн өвс шатаж байсныг 20 минут ажиллаж унтраасан.

Баян-Өлгий аймаг, Бугат сум. Бугын гол багийн “Буга” гэдэг газар /аймгийн төвөөс зүүн зүгт 18 км, сумын төвөөс зүүн хойд зүгт 10 км/-т өвс шатаж байна гэсэн дуудлагыг 10.26-ны өдрийн 15:20 цагт хүлээн авсан. Тус аймгийн Онцгой байдлын газрын Гал түймэр унтраах, аврах 31 дүгээр ангийн алба хаагчид 18 км замыг туулан 15:41 цагт очиход иргэн М-ны хашаанд 9 тн өвс шатаж байсныг 1 цаг 36 минут ажиллаж унтраасан.

Хэнтий аймаг, Хэрлэн сум. 8 дугаар багийн “Донойн даваа” гэдэг газар /аймгийн төвөөс хойд зүгт 45 км, Бэрх тосгоноос баруун зүгт 32 км/-т айлын өвөлжөө шатаж байна гэсэн дуудлагыг 10.26-ны өдрийн 14:45 цагт хүлээн авсан. Тус аймгийн Онцгой байдлын газрын Батноров сум дахь Гал түймэр унтраах, аврах 42 дугаар ангийн алба хаагчид, Тахилгат тосгоны мэргэжлийн анги, орон нутгийн иргэдтэй очиход иргэн Б-ын 14 бог мал, 16х6 метрийн хэмжээтэй малын саравч, 300 боодол өвс, хураалттай аргал, малын бууц бүрэн шатаж байсныг 58 минут ажиллан унтраасан.

Баян-Өлгий аймаг, Өлгий сум. Харсай 10 дугаар багийн 1 дүгээр гудамжинд амбаар шатаж байна гэсэн дуудлагыг 10.26-ны өдрийн 18:55 цагт хүлээн авсан. Тус аймгийн Онцгой байдлын газрын Гал түймэр унтраах, аврах 31 дүгээр ангийн алба хаагчид 2 км замыг туулан 18:58 цагт очиход иргэн Б-ны 4х8 метрийн хэмжээтэй амбаарт 3.5 тн өвс шатаж байсныг 30 минут ажиллаж унтраасан.