"Ханжоу 2022": Хүндийн өргөлтийн тамирчин Б.Эрдэнэзулаас хориотой эм бэлдмэл илэрчээ

Азийн олимпын зөвлөлөөс Ханжоугийн Азийн наадмын допингийн эсрэг хөтөлбөрийг бие даан зохицуулах үүргийг олгосон Олон улсын шинжилгээний байгууллагаас Монголын хүндийн өргөлтийн тамирчин Буяндэлгэрийн Эрдэнэзулаас авсан дээжээс хориотой эм бэлдмэл илэрсэн талаар мэдээллээ. Дэлхийн допингийн эсрэг агентлаг (WADA)-ийн Хориотой бодисын жагсаалтад заасан тодорхой бус стероид дростанолоны метаболит илэрчээ.

2023 оны аравдугаар сарын 1-ний өдөр Олон улсын шинжилгээний байгууллага тэмцээний бус үед тамирчнаас дээж авч, Хятадын допингийн эсрэг агентлагт сорьц цуглуулжээ. Тамирчинд энэ тухай мэдэгдсэн бөгөөд тэр даруйд нь тэмцээнд оролцох эрхийг нь түр хугацаагаар түдгэлзүүлсэн байна. Тэрээр В сорьцын шинжилгээ хийлгэх эрхтэй.