Оросын шигшээ багийг 15 сая ам.доллар хүлээж байна

Сайн тогловол Оросын хөлбөмбөгийн шигшээ багийг шагналын их мөнгө хүлээж байгаа тухай “Хуучин талбай” телеграм-суваг мэдээлжээ.

Энэ сувгийн мэдээлснээр, Саудын Арабын багийг хожсоноор оросын хөлбөмбөгчдийг 8 сая ам.доллараар шагнасан байна (тамирчдад 6 сая, дасгалжуулагчдын багт 2 сая).

Мөн шөвгийн наймд үлдвэл 12 сая ам.доллараар шагнах сураг гарсан байна (тамирчдад 9 сая, дасгалжуулагчдад 3 сая). Энд Уругвайн шигшээ багтай тоглох дүнг тооцохгүй ажээ.

Хэрвээ Оросын шигшээ баг шөвгийн дөрөвт үлдвэл, нэмж 15 сая ам.доллар авах гэнэ. Дараагийн шатны тоглолтын шагналын тухай мэдээлэл одоогоор тодорхойгүй байгаа аж.

Оросын шигшээ баг одоогийн аварга шалгаруулах тэмцээний плей-офф-т (хасагдах шатанд) орсон анхны баг болсныг тэмдэглэж байна. Түүнчлэн тус баг нэг дээд амжилт тогтоосон бөгөөд өмнө нь тэмцээн зохион байгуулсан нэг ч эзэн орон хоёр тоглолтын дараа 8 гоол оруулаагүй юм.

С.Инда