“Таван толгой” ХК-ийн хувьцааны ханш 78 хувиар өсчээ

Сүүлийн гурван сарын хугацаанд Монголын Хөрөнгийн биржид бүртгэлтэй 82 компанийн хувьцааны ханшид өөрчлөлт гарсан тухай “Marketinfo” мэдээллээ.

Эдгээрээс 54 хувьцааны ханш өссөн бол 28 компанийн хувьцааны ханш бууралттай байна. Ханшийн өсөлтийг харвал “Хөвсгөл алтан дуулга” компанийн хувьцааны ханш хамгийн дээд буюу 129.32 хувиар өссөн бол “Евразиа капитал холдинг”-ийн хувьцааны ханш 101.03 хувиар харин “Таван толгой” компанийнх 78.67 хувиар тэргүүлсэн байна.

“Таван толгой” компанийн хувьд, энэ оны эхний хагас жилд нүүрсний борлуулалтаас 255.01 тэрбум төгрөгийн орлого олж, 57.19 тэрбум төгрөгийн цэвэр ашигтай ажилласнаа тайлагнасан. Энэхүү ашиг нь компанийн 2016 оны жилийн эцсийн ашгаас давсан үзүүлэлт болсон аж.

Харин "Автозам" компанийн хувьцааны ханш хамгийн өндөр буюу 33.33 хувиар унасан бол “Мерекс” компанийн ханш 31.65 хувиар мөн “Монгол алт” компанийнх 25.66 хувиар унасан байна.