Оросын хоккейчид олимпийг орхилоо

{!!!left!!!}Өвлийн олимпийн хамгийн их үзэгчтэй, хамгийн том спорт болох хоккейн ширүүн тулаанууд үргэлжилсээр байна.

Өчигдөр олныг шуугиулсан тоглолтоор яах аргагүй ОХУ-ын хоккейчид Финляндын эрэгтэйчүүдийн шигшээ багт 3:1-ийн харьцаагаар хожигдсон явдал байлаа.

Тоглолтын эхний үед Илья Ковалчук тооны харьцааг 1:0 болгож улмаар оросууд хэтэрхий эрт тайвширсан уу ямартай ч хамгаалалтын алдаанаас болж дараалан хоёр шайб хаалгандаа алдсан юм.

Аалтонен, Селанни нарын гоолоос хойш хоёрдугаар үед оросууд тооны харьцааг тэнцүүлэх гэж хэт улайрснаасаа мөн л финчүүдийн довтолгоог зогсоож чадаагүй юм.

Гранлундын хийсэн шайб тооны харьцааг 3:1 болгож улмаар оросууд өөрт ирсэн боломжоо ашиглаж чадалгүй байсаар гуравдугаар үе өндөрлөсөн.

Ингэснээр өөрийн нутагтаа зохиож буй цагаан олимпод Павел Дацюк ахлагчтай оросын хоккейчид медалийн ч бараагүй хоцорч байна.

Алдарт уран гулгагч Евгений Плюшенкогийн дэгдээсэн шуугианаас хойш ийнхүү хоккейчид нь илүү том шуугиан дэгдээсэн гэхэд ч болно.

Харин Финляндын учраа багаар өрсөлдөгч Словенийг 5:0-ийн харьцаагаар бут ниргэсэн шведчүүд тодроод байна.

Харин нөгөө талд Канадын шигшээ Латвийг 2:1-ээр, АНУ Чехийг 5:2-оор тус тус буулган авснаар Канад-АНУ гэсэн тоглолт гарч улмаар алтан медалийн төлөө Швед, Финляндын аль хожсонтой тоглохоор болоод байна.

Өнөөдрийн хувьд эмэгтэйчүүдийн хоккейн алт, мөнгө, хүрэл медалийн төлөөх тоглолтууд явагдах юм. Хүрлийн төлөө Швейцарь Шведийн бүсгүйчүүд өрсөлдөх бол аваргын төлөө Канад АНУ-ын эмэгтэйчүүдийн шигшээ баг тулгарах юм. Хүрлийн төлөө тулаан Улаанбаатарын цагаар 20.00 цагаас эхлэх бол алтын тулаан шөнийн 01.00 цагаас явагдана.

Н.Дорж