Танхай эмээ хэн байв

Өчигдөр болсон Online media awards ёслолын ажиллагааны үеэр цахим ертөнцийнхний татсан нэгэн үйл явдал болсон нь "Оны шилдэг жиргээч"-ийг тодруулсан явдал байлаа.

Анх удаа тодруулж байгаа энэ арга хэмжээнд нэр дэвшигчдээс шилдэг гуравт жиргээч Танхай эмээ, Б.Цогтгэрэл, А.Урангоо нар тунаж үлдсэн юм.

Тэдний нэгийг оны шилдгээр тодруулахаар Online media awards ёслолд ирсэн зочдоос мессежээр санал авахад Танхай эмээ ялалт байгуулав.

Ингээд оны шилдэг жиргээчийн шагналыг гардуулах болоход онлайн ертөнцөд жиргээ нь олны танил болсон хэрнээ одоо болтол нууцлаг хэвээр байгаа Танхай эмээ гэгч хэн бол таавар үүссэн.

Гэтэл нэг биш таван залуу тайзнаа гарч Танхай эмээгийн шагналыг гардаж авлаа.

"Танхай эмээ бидэн рүү та муу сайн дагзнууд яваад шагналыг минь аваад ир гэж DM явуулсан" хэмээн тэд тайлбарласан юм.

Мөн нэг нь "Танхай эмээ нэг шагналын төлөө ил гарч ирэхгүй нь тодорхой болохоор бид замаас нь завшиж, шагналыг нь авч байна" гэж хошигнов.

Гэсэн хэдий ч Танхай эмээ таван админтай юм байна, тэд нь шагналаа гардаж авлаа гэсэн мессэж нисэж байна. Танхай эмээгийн шилдэг жиргээчийн шагналыг гардаж авагчид нь Артгаа ‏ @artanyan, bilguun ‏ @Gumpaa, Аанхаа ‏ @Aanxaa нарын 5-н жиргээч байсан юм. Тэд Танхай эмээг бүтээгчид юм болов уу.