Дундговь аймаг Засаг даргатай болж чадах уу

Дундговь аймгийн Засаг дарга огцроод удаагүй байна. Хуульд зааснаар бол 14 хоногийн дотор аймгийн ИТХ хуралдаж дараагийн хүнийг ерөнхий сайдад санал болгох ёстой.

Өнөөдөр болох ИТХ-аар засаг даргын асуудлыг хэлэлцэх тов гар­чээ. Гэвч өнөөдрийн хур­лаар Дундговь аймаг засаг дар­гатай болох эсэх нь то­дорхойгүй байгаа аж.

Учир нь тус аймагт дахин улс тө­рийн хуйвалдаан, эцэс төгсгөлгүй маргааны үүд хаалга нээгдчихээд байна. Нэгэнт огцорсон Засаг дарга нарын хэн нь хэн байсан тухай одоо нурших нь илүүц юм.

Харин дараагийн хүн хэн байхыг Дундговийн иргэд хүлээж байна.

Дараагийн Засаг даргад АН-аас Дундговь аймгийн АН-ын дарга С.Од-Эрдэнэ болон Ж.Наранцацралт агс­ны туслахаар ажиллаж бай­сан Б.Мөнхболор, МАН-аас Барилга хот байгуу­лал­тын яамны төрийн нарийн бич­гийн дарга асан, мөн Ж.Наранцацралт агсны тус­лахаар ажиллаж байсан Ц.Ганхүү нар өрсөлдөхөөр яриг­даж эхэлжээ.
Дундговь аймгийн АН-ын дарга С.Од-Эрдэнийн хувьд хожим улс төрд орсон нэгэн. Түүнд улс төрийн салбарт хийсэн сайн, муу түүх бага. Дундговийн АН-ынхны хувьд даргаа сойх зорилго тавьж, улс төр хийж байгаа нь нэгэнт тодорхой болсон.

Гэвч МАН-ын нэр дэвшигч Засаг даргын сонгуульд “дагуултайгаа” ирсэн нь тус аймгийн улс төрийг дахин бужигнаанд оруулжээ. АН-аас С.Од-Эрдэнэтэй санал хувааж хамт нэр дэвших Б.Мөнхболорыг МАН-аас нэр дэвшигч Ц.Ганхүү дагуулан очиж буй аж. Тэд талийгаач Ж.Наранцацралтыг амьд ахуй цагт нь хоёул ҮШН-ын гишүүн болж, туслахаар нь ажиллаж байжээ.

Гэвч Ж.Наранцацралт агсныг өнгөрсний дараа Ц.Ган­хүү МАН-руу, Б.Мөнх­­­­­болор МоАХ руу ур­важ орсон байдаг. Б.Мөнх­­болор нь Ардчил­сан холбооны партизануудтай нийлж С.Эрдэнэ гишүүний туслахаар ажилласан ч “хор найруулсан” хэрэгт унаж хөөгдсөн гэдэг. Харин Ц.Ганхүүгийн хувьд 2008 онд сонгуульд унаснаасаа хойш Дундговийг “умартаж” нийслэлд үлдсэн. Нэг ий­мэр­хүү түүхтэй хүмүүс Дунд­­говь аймгийн иргэдийн амьдралыг “залуурдахаар” ухасхийсэн нь нутгийн ир­гэ­дийн дургүйцлийг тө­рүүлж буй.

Өнөөдөр болох хурлаар Засаг даргаа сонгож ча­­дах­­гүйд хүрвэл, эсвэл Ж.На­ранцацралт агснаас ур­­ван тэр­сэлсэн хэн нэгэн эт­гээд сонгогдвол нутгийн иргэ­­дийн дунд засагт итгэх итгэл улам бүр суларч, Дундговь аймгийн улс төр эцэс төгс­гөлгүй маргаанд хүрч мэ­дэхээр байгаа юм.

Учир нь одоогийн МҮАН, угтаа бол АН-аас урвасан Ц.Ганхүү ИТХ-аас олон санал авч гарлаа ч Ерөнхий сайд батламжлахгүй бу­цаах магадлал өндөр. Б.Мөнх­бо­лорын хувьд АН-ын дар­гын­хаа саналыг хуваах зорил­гыг анхнаасаа өвөрлөж ир­­сэн учраас нэг хоёр санал л “зулгаана”.

2008 онд яг ийм байд­лаар Б.Мөнхболор на­рын найруулсан “жороор” Ц.Ган­хүүг АН-аас нэр дэвшигч Б.Дэлгэрмаагийн эсрэг тавин унагаж байжээ. Үү­ний дараагаас Дундговь ай­магт нэг намаас нөгөөд урвах, өөрийн намын нэр дэвшигчийг бусадтай хуй­вал­дан унагах хуйвалдаан газар авсан байх юм.

Ер нь нутгийн иргэдийн хувьд улс төрийн аль нэг намд харьяалагдаж, үзэл бодлынхоо төлөө тууштай өрсөлдөх нь зүйн хэрэг. Гэвч “стандарт бус” улс төрийн тоглолтууд хөдөө орон нутгийн улс төрд ихээр түрэн орж ирж байгаа нь жирийн иргэдийн амьдралд хүндээр тусч байна.

Ганцхан жишээ дурьдахад бүтэн хоёр жилийн турш сандал ширээний төлөө тэмцэлтэй явсан Дундговь айм­гийн жилийн төсөв най­ман тэр­бум төгрөг болт­лоо буур­чээ. Гэтэл яг хажууд нь ор­шиж байгаа Өмнөговь айм­гийн жилийн төсөв 170 тэрбум төгрөгөөр яригдаж байх жишээтэй.

Угаас бай­галийн баялаг багатай, дэд бүтцийн хувьд сул хөгжсөн тус аймаг хөгжих нөхцлөөр муу аймгуудын тоонд ордог.

Тэгвэл төр засагтай хэл амаа ололцож, тогтвортой ажил­лаж чадах, төсвөөс мөнгө салгаж чадах баг дундговьчуудад хэрэг­тэй бол­жээ.

Тиймээс ч Дунд­говийн ард түмэн хоёр намаас зөв­шилцөхийг шаар­дах болсон байна. Өнөөдөр болох ху­ралдаанаас гарах үр дүнг бид эргэн мэдээлэх болно.