Б.Нармандах, М.Ичинхорлоо нар хүрэл медаль хүртэв

Хорватын нийслэл Загребт ОУЖБХ-ны гран при тэмцээн эхэллээ. Эхний өдөр эрэгтэйчүүдийн 66 кг-д ОУХМ Б.Нармандах Израилийн Д.Дишелийг 1 минут 8 секундэд, Мароккогийн И.Бассоуг 5 минут 17 секундэд, дэлхийн аваргын хүрэл медальт, Молдавын Д. Вьеруг 4 минут 3 секундэд тус тус цэвэр ялж, Румыны Б.Думитрескуд вазаригаар ялагджээ. Ингээд дагах барилдаанд БНСУ-ын Ан Жехоныг 4 минут 43 секундэд вазаригаар ялсан 22 настай ОУХМ маань хүрэл медалийн төлөө Болгарын Я.Герчевтэй цаг сунгаж, 6 минут 32 секундэд цэвэр ялсан аж.        Харин эмэгтэйчүүдийн 57 кг-д хүч үзсэн ОУХМ М.Ичинхорлоо эхлээд хийлж, дараа нь олимп, дэлхийн аварга, Бразилын алдарт бөх Р.Силваг 6 минут 43 секундэд вазаригаар, Косовогийн Л.Флакаг 2 минут 15 секундэд цэвэр, ялсан ч Кубын О.Гарсиад 4 минут 51 секундэд вазаригаар дийлдэв. Дагах барилдаанд 3 минут 29 секундэд Хорватын Т.Тополовечээс хоёр дахь вазаригаа авч, цэвэр ялсан тэрбээр Словенийн К.Кайзерийг 8 минут 32 секундэд цэвэр ялж, хүрэл медалийн болзол хангалаа. Энэ нь 24 настай М.Ичинхорлоогийн гран пригээс хүртсэн анхны медаль юм.