"Ливерпуль" Аваргуудын лигийн шигшээд арав дахиа шалгарав

      Аваргуудын лигийн хагас шигшээгийн хариу тоглолтын эхнийх урьд шөнө Испанийн Вильярреал хотын "Керамика-Эл-Мадригал" цэнгэлдэх хүрээлэнд боллоо. Эхний тоглолтод 0:2-оор хожигдсон "Вильярреал"-чууд эхний үеийг 2:0-ээр хошуучилсан ба гурав дахь минутад 25 настай сенегал довтлогч Б.Диа, 41 дэх минутад 30 настай франц хагас хамгаалагч Ф.Коклен гоол оруулжээ. Гэвч тэд энэ давамгайллаа төдөлгүй алдах нь тэр. Хоёрдугаар үеийн 62 дахь минутад "Ливерпуль"-ийн хагас хамгаалагч Фабиньо тооны зөрүүг ойртуулж, таван минутын дараа довтлогч Л.Диас тоог тэнцүүлэн, 74 дэх минутад довтлогч С.Мане эцсийн цэгийг тавьсан юм.