Г.Ариунбаатар Мариинскийд, Э.Амартүвшин Флоренцид гайхууллаа

Монголын хоёр алдартай дуучин, баритон хоолойтнууд дэлхийн тайзнаа дуулсан сайхан мэдээ олны сонорт хүрэв. Монгол Улсын Гавьяат жүжигчин, "Чингис хаан" одонт дуучин Г.Ариунбаатар ОХУ-ын Мариинскийн театрт энэ сарын 6-нд Ж.Вердийн "Травиата" дуурийн Жоржио Жермонтын дүрд дуулжээ. Түүний дуулахыг сонсох гэж ОХУ-ын Ардын жүжигчин Л.Линховойн охин Дарима Линховой багш нь Улаан-Үдээс зорин очсон байна. Тэрбээр энэ тухай "Эрдэм чадалтай багш нарынхаа хөдөлмөр, хүчээр өдий зэрэгтэй явж байна гэж байнга боддог доо. Дарима Линховой багш маань надаас "Травиата" дуурийн Жермоны дүрийг хэрхэн бүтээж байна вэ гэж шалгалт авахаар алс Улаан-Үд хотоос ирсэн. Гайгүй байсан юм шиг байна аа, би. Багш өчигдөржин л жоохон хүүхэд шиг баярлаад л, үргэлж инээгээд л... Багшийг ийм байхыг харах хэчнээн сайхан" хэмээн нүүр номдоо бичжээ.