Хамгийн баян орос эмэгтэй зочид буудлаа хямдруулж зарна

 Тэргүүн баян орос эмэгтэйд тооцогддог, Москва хотын захирагч асан Юрий Лужковын бэлэвсэн гэргий Елена Батурина коронавирус гарахаас өмнө зарахаар шийдсэн Ирландын Дублин хот дахь дөрвөн одтой зочид буудлаа хямдруулахаар шийджээ. "The Irish Times" сонинд уг зочид буудлыг 68 сая ам.доллараар худалдаж авах боломжтой болсон талаар мэдээлсэн. Уул нь Елена Батурина 1996 онд ашиглалтад орсон эл үл хөдлөх хөрөнгийг 80-85 сая ам.доллараар худалдах сонирхолтой байсан аж. 15 хувиар хямдруулсан ч үлэмж хэмжээний ашиг унагах тэрээр "Morrison" зочид буудлыг 2012 онд 22 сая доллараар худалдан аваад, сэргээн босголтын ажилд 10 орчим саяыг зарцуулсан юм. 145 өрөө, хурлын долоон танхим, фитнесс төв, хэд хэдэн ресторан, баартай зочид буудлын шинэ эзэн хайх ажлыг CBRE компани хариуцаж буй.