Аргентинчууд шүтээнийхээ зургийг мөнгөн тэмдэгт дээрээ мөнхлөхийг хүсэж байна

                  Өнгөрсөн сарын 25-нд 60 настайдаа таалал төгссөн домогт хөлбөмбөгч Диего Марадонаг нутагт нь найман настай балчраас наян настай буурал хүртэл шүтдэг гэхэд хилсдэхгүй. Тэгвэл тэд шүтээнийхээ хөргийг мөнгөн тэмдэгт дээрээ мөнхжүүлэх хүсэлтээ засгийн газартаа уламжилсан байна. Одоогийн байдлаар энэ арга хэмжээнд 137 мянга гаруй хүн гарын үсгээ зурж нэгдээд буй гэнэ. Тэднийхээр алдарт хөлбөмбөгчний хөргийг 10 мянган песогийн дэвсгэрт дээр дүрслэх бөгөөд Аргентины төрийн далбааны цэнхэр, цагаан өнгө бүхий мөнгөн дэвсгэртийг аль хэдийнэ засгийн газартаа өргөн барьжээ. Уг мөнгөн дэвсгэртийн голд залуу Диего Марадонагийн том хөрөг, ард нь "Мексик-1986" дэлхийн аварга шалгаруулах тэмцээнд түрүүлсэн зураг нь байх аж. Харин тус улсын засгийн газар хараахан хариу өгөөгүй байна.